Cartas de inverno, en Banda Deseñada

Un aviso importante: xa temos na biblioteca un exemplar-fermosamente dedicado, ademais-da novela gráfica Cartas de inverno, realizada por Antonio Seijas.

Como sabemos que a novela de Agustín Fernández Paz está entre as favoritas de boa parte  do alumnado, estamos convencidos de que este cómic non vai parar de circular.

Os dous libros, aínda mantendo o mesmo tema e a mesma estrutura, son obras diferentes  porque as distingue a mirada persoal dos seus autores. Se Agustín  Fernández sabe envolvernos nese ambiente de misterio, intriga e terror coas súas palabras, Antonio Seijas fai o mesmo coas súas imaxes. No cómic aos personaxes que Agustín deixa sen describir fisicamente, Antonio ponlles rostro; a paisaxe cobra moitísima forza a través do debuxo  e o uso das cores define perfectamente o atmosfera de desacougo e pánico que rodea o protagonista.
"Antonio Seijas manexa con especial habilidade a  montaxe das viñetas na páxina, o que fai que a narración avance con moita naturalidade". Son palabras de Agustín Fernández na presentación do cómic.
Unha obra fantástica, que se le dun tirón. Podemos dicir, abofé, que lle quedou "de medo"!!
Á túa disposición na biblioteca!

Novos exemplares de Banda Deseñada

Temos novidades na biblioteca! Recén chegadas as últimas publicacións de banda deseñada e novela gráfica en galego; unha pequena mostra do excelente traballo dalgúns dos nosos mellores debuxantes. Informámosche sobre elas, pero pasa pola biblioteca para gozar da súa lectura.

Causas Nobres, de Fran Bueno

Causas Nobres é o título do volume que recolle por vez primeira en galego o traballo do compostelán Fran Bueno con guións de Jay Faerber que vira a luz en Estados Unidos como Noble Causes aló polo ano 2002. A historia narra a vida da familia Noble, cuxos membros están dotados de superpoderes, e obtivo un grande éxito na súa edición orixinal.

Vento do Norte, de ÁlexCal

Creada polo escritor e produtor americano David DiGilio e acompañada do estilo do novo debuxante galego Álex Cal. O escenario escollido é un planeta Terra destruído e desolado, a onde o vento do norte trouxo un inverno sen fin. Os poucos sobreviventes resisten refuxiados nas grandes cidades conxeladas, nas que a vida é unha loita continua na procura da calor.

Nómades, de Xosé Tomás

Unha visión da emigración a través de historias de mulleres. Cada capítulo céntrase nunha protagonista que vai dun lugar a outro. Hai unha muller que cruza o estreito e chega a un lugar como España, outra que podería ser cubana e que chega para traballar como médica.

Tolos, de Xosé Tomás

Álbum de BD realizado para a Universidade da Coruña no que cinco relatos breves nos presentan personaxes relacionados dalgún xeito coa vida universitaria: Formación, voluntariado, investigación, vocación. Contén un apéndice con mostras do proceso creativo da banda deseñada.

A man do diaño, de Brais Rodríguez

Unha ollada sobre a guerra, un conflito bélico nun país indeterminado que leva a cada personaxe que o sofre a ter que enfrontarse consigo mesmo. Obra gañadora do premio Castelao 2010 da Deputación da Coruña. Prólogo de David Rubín.

O burato do Inferno, de Ramón Trigo

A mediados do S. XIX nas costas galegas os raqueiros, piratas de terra, aproveitaban as noites sen lúa e prendían fogueiras para enganar as embarcacións que navegaban próximas, e así facíanlles crer que seguían o rumbo correcto. De súpeto, os barcos encallaban nunha praia ou estrelábanse contra as rochas e eran atacados polos raqueiros, que os asaltaban e os despoxaban rapidamente da súa carga.

NOVIDADES NA NOSA BIBLIOTECA!!!!

Déstesvos conta de que o andel de NOVIDADES está ateigado? Non só hai libros de lectura (que chegaron moitos), hai tamén pelis moi diferentes (estamos notando un especial interese este curso polas películas e iso agrádanos moito) e libros informativos pedidos dende o Departamento de Orientación sobre temas do voso interese: a internet, as redes sociais, as relacións cos pais...

Pasáde pola biblioteca e mirade, seguro que atopades algo ao voso gusto.

TEMOS NOVIDADES NA BIBLIOTECA!!!

O andel de novidades está inzado de libros. Lembrades que fomos á FNAC e mercamos libros? Pois xa as temos na biblioteca. Especialmente estarán contentos os do Club de Lectura, pois eles foron os que os escolleron.

TEMOS NOVIDADES NA BIBLIOTECA

Ao longo destes días foron chegando á biblioteca libros novos, que estarán expostos no andel de novidades en canto remate a exposición de prensa. Algúns deles foron solicitados por vós coma o manga en galego Bícame profe! 2 e Bícame profe! 3 que levades tanto tempo insistindo para que volos trouxeramos.
Tamén chegaron a 2ª e 3ª parte de Os Megatoxos, de Anxo Fariña, que teñen un clube de seguidores ,especialmente entre o alumnado de 1º.

Outros libros foron seleccionados dende a biblioteca, porque pensamos que vos ían gustar e que sería interesante que vos achegásedes a eles. Son destes dos que vos imos falar:

La escalera prohibida de Padma VENKATRAMAN, autora india e residente en EE.UU. que chegou a publicar máis de 20 libros de literatura xuvenil, con diferentes temáticas, a pesar da súa curta idade. Neste conta a historia de Vidya, unha adolescente cunha vida apacible e que soña con ir á universidade. Pero, a causa dunha traxedia ten que ir á casa dos seus tíos paternos, que non admiten que as mozas e os mozos teñan os mesmos dereitos. Raman, un mozo que coñece Vidya, axudaralle a que o mundo sexa un pouco máis agradable, acompañándoa máis alá da escaleira prohibida.

Non nos digades que non vos entran ganas de lelo!!! VEÑA, espera por vós na biblioteca.

O outro (ou outros, porque se trata dunha triloxía) que vos queremos recomendar é La ira del fuego, de Henning MANKELL, autor sueco do que xa temos falado en VIbliOS. Esta vez a través dos tres libros, El secreto de fuego, Jugar con fuego e La ira del fuego, Mankell cóntanos a historia real de Sofía, dende que a coñece, sendo só unha nena, ata pasados doce anos. Sofía vive nun dos países máis pobres do planeta, Mozambique, onde se fai maior no medio da guerra, a corrupción, a pobreza e a enfermidade.

Para todos eses que nos dicides que non vos gustan as historias fantásticas, que queredes historias que falen do que acontece na realidade están seleccionados estes tres libros. Seguro que vos van gustar.

TEMOS NOVIDADES NA BIBLIOTECA

Premio Caixa Galicia de Literatura Xuvenil. O bar "Luzada" é o lugar de encontro de personaxes moi diversos e con historias particulares que contar, que nos aproximarán a outras culturas e outros costumes.
É un libro moi tenro, de lectura agradable e que seguro lle gustará a todo o mundo.

Este é o primeiro libro dos catro de Henning MANKELL, que teñen como protagonista a Joel, un neno que no primeiro libro vai cumprir doce anos e no último ten quince. Joel vive só co seu pai, nun pequeno pobo do norte de Suecia, no que os invernos son moi longos, moi fríos e moi aburridos. Joel terá que empregar a súa imaxinación para provocar situacións que lle permitan saír do tedio diario e coñecer a interesantes personaxes.
Os outros títulos son:
Las sombras crecen al atardecer.
El niño que dormía con nieve en la cama.
El viaje al fin del mundo.
Están todos na biblioteca. Invitámoste a que os leas.E logo xa nos contarás...

Achegádevos a este libro, abrídeo, fixádevos nas imaxes.... É un pracer ter entre as mans libros coma este!!!!

Comeza a lectura, coñece a Hugo e adéntrate en París a comezos do século XX. Desentraña con el o misterio que xira en torno a un estraño mecano, cuxa chave ten unha misteriosa rapaza, sobriña dun misterioso xogueteiro, que a súa vez encerra moitos outros misterios que teñen que ver co inicio do cine... Déixate atrapar!!!