César Mallorquí, Premio Nacional de Literatura Xuvenil

A estas alturas, xa saberedes que César Mallorquí acaba de conseguir o Premio Nacional de Literatura Xuvenil pola súa última novela: La isla de Bowen (Edebé, 2013)

Xa que neste centro, César Mallorquí ten un ben nutrido club de fans, sobre todo lectores e lectoras de As lágrimas de Shiva, non queriamos deixar pasar esta oportunidade para mostrar a nosa alegría.

Aquí  deixamos una entrevista do autor  no programa Página 2, para que o coñezades mellor.

Se tes interese, pasa pola biblioteca: hai moitos libros de César Mallorquí agardando por ti.

Página 2 - Entrevista a César Mallorquí

• Página 2 - Entrevista a César Mallorquí

BOAS NOVAS PARA A POESÍA GALEGA!

O Ministerio de Cultura acaba de conceder o Premio Nacional de Poesía ao poeta coruñés Manuel Álvarez Torneiro. Esta é unha magnífica nova que non podiamos deixar pasar sen compartir con todos vós, neste espazo no que tanto nos importa a literatura e a lingua. 

A concesión deste premio "cementa o idioma e recoñece o valor da nosa lingua" en palabras do propio poeta. É o primeiro Premio Nacional de Poesía concedido a unha obra lírica escrita en galego.

 Os ángulos da brasa, a obra premiada, acadara xa antes outros recoñecementos importantes como o da Crítica Española ou o da Asociación de Escritores en Lingua Galega. En palabras de Manuel Torneiro, este poemario responde  a temas do día a día... non é un  produto estándar, nin frívolo, nin lúdico, nin simplista. Incide nunha realidade que é tan persoal como plural e foi escrito con ese acento rigorosamente humano.

Pasa pola biblioteca se queres gozar da súa lectura.

Recomendacións lectoras para o verán

Pechamos o blogue ata setembro, pero antes queremos deixarvos aquí unha selección de libros que consideramos interesantes; por se estades perdidos, por se non sabes que ler neste verán, fica aquí este PDF para que o consultedes. Bótalle unha ollada porque estamos seguros que algún destes libros será a compañía perfecta para este tempo de lecer. O equipo da Biblioteca dávos as grazas pola vosa participación e entusiasmo durante este curso que está a piques de rematar.

Cos nosos mellores desexos, pasade un bo verán!

PREMIO "LIBROS DIMINUTOS..."

Xa temos ganador, ou mellor dito, ganadoras, do I Concurso "Libros diminutos para ler en segundos". As premiadas son Angélica Pérez e Ana Belén Taibo, alumnas de 1º A. Nesta pequeniña obra de arte, Como la vida misma, as autoras sérvense da orde alfabética das palabras para narrar unha historia de amor, un verdadeiro paseo polos sentimentos e vivencias de dúas persoas que comparten toda unha vida. O xurado valorou tanto o historia en si mesma como a coidada elaboración deste minilibro. Non foi unha decisión fácil, pois foron moitos os traballos presentados e de moita calidade.

O éxito deste concurso anímanos a preparar novas convocatorias en cursos vindeiros. Grazas a tod@s os participantes e parabéns ás ganadoras!

Revista Ollos de Aula

 

Deixamos aquí a revista Ollos de Aula que edita a Coordinadora galega de ENDL por se queredes botarlle unha ollada. Este número contén un interesante artigo de Agustín Fernández Paz no que reflexiona sobre a importancia da lectura na etapa escolar, e no que aporta prácticos consellos sobre este tema para as familias do alumnado.

 Moi ben traído neste mes que dedicamos aos LIBROS.

E un AVISO: a próxima semana empezaremos a colocar os mini-libros da exposición que organiza o equipo da Biblioteca baixo o lema LIBROS DIMINUTOS PARA LER EN SEGUNDOS

Animádevos e entregade os vosos exemplares na Biblioteca!

Feliz Día de Rosalía!

O 24 de febreiro conmemórase coma todos os anos o aniversario do nacemento da poeta en 1837 en Compostela. Pero este non é un ano máis: o 17 de maio farán 150 anos da publicación de Cantares Gallegos, o fito que marcou o inicio do rexurdimento cultural de Galicia. Dende hai meses son moitas as entidades e persoas que veñen reclamando que coincidindo con esta efeméride o 2013 se dedique ao coñecemento e á reivindicación da poeta e se dote á celebración dun carácter oficial. 

Para celebralo, deixámosvos un vídeo da Asociación de Escritoras e Escritores en Lingua Galega.

Abraia comprobar a vixencia e actualidade dos versos de Rosalía!

V XORNADA DOS CLUB DE LECTURA

O pasado sábado, 9 de xuño, asistimos á V Xornada de Clubs de lectura, celebrada no Palacio de Congresos de Santiago.  Foi unha intensa xornada que aproveitamos para compartir experiencias entre os moitos clubs de lectura, que agora mesmo funcionan nos centros de ensino de toda Galicia. Este ano, por primeira vez, estaban convidados alumnos e pais e nais dos clubs de adultos. Gustounos oílos na mesa; contáronnos as súas vivencias, como  as reunións para falar dun libro lido por todos "alimentan neles o corpo e o espírito".

Recollemos tamén ideas para  a dinamización das lecturas, títulos que apetece ler, roteiros literarios que nos gustaría  "patear"... Só queda esperar que todos os viós-bardos sigamos comprometidos co club como ata agora. 

Estados de ánimo

Como ben sabedes, hai uns días conmemorouse o Día Mundial da Poesía. Por este motivo, queremos aproveitar para publicar unha mostra do traballo realizado polo alumnado de 1º de ESO nas aulas de Lingua Castelá e Literatura. Máis concretamente, tres poesías que versan sobre os estados de ánimo. Esperamos que vos gusten!

Microrrelatos no IES Viós

Esta semana celebrouse no noso centro o concurso de microrrelatos Amoriños collín... en cen palabras, organizado conxuntamente polo Departamento de Lingua e Literatura Galega e o Equipo de Dinamización Lingüística. A actividade resultou todo un éxito, pois a cantidade de relatos presentados e a súa calidade así o acredita. Desde a Biblioteca do noso IES queremos dar grazas a todos os participantes, felicitar aos gañadores/as e recoñecer tamén o traballo e iniciativa das dúas profesoras dos departamentos anteriormente citados, Fátima e Teresa. Moitas grazas!

AMOR DE FRONTE
Ángel Vicos Fernández, 4º ESO - Gañador

- Ola.
- Ola.
- Que tal estás?
- Triste.
- Por que?
- Deixoume a miña moza.
- Estache ben empregado, por burro!
- Es tonto ou que?
- Pegábaslle e insultábala, como queres que seguira contigo!
- Me cago na... Vouche dar unha hostia que vas quedar teso!

E así foi como rompeu o espello.

Agora preme na imaxe para ver todos os premiados:

Charles Dickens

O 7 de febreiro do ano 1812 naceu en Portsmouth, Inglaterra, un dos autores máis importantes da literatura universal: Charles Dickens. Autor de obras tan recoñecidas como Oliver Twist, David Copperfield, Historia de dúas cidades ou Os papeis do club Pickwick, Dickens foi un destacado cronista da realidade da época que lle tocou vivir. As súas novelas eran verdadeiros traballos de crítical social: temas como a explotación infantil, a loita de clases ou a pobreza da clase traballadora están presentes ao longo de toda a súa produción. Estes temas aparecen tratados en moitas ocasións co humor e ironía que caracteriza a obra de Dickens.

Deixamos aquí un enlace ao especial que lle dedica o diario El Mundo con motivo do 200º aniversario do seu nacemento. Preme na imaxe para acceder a el.

Andrea Maceiras no IES Viós

Onte estivo con nós Andrea Maceiras, a autora de Violeta Tamurana, un dos libros que o alumnado de 1º de ESO leu no primeiro trimestre deste curso. O encontro foi organizado polo Departamento de Lingua e Literatura galegas, en colaboración coa Biblioteca e o Equipo de Dinamización Lingüística. Era unha visita certamente agardada; todos estabamos ansiosos por coñecer a Andrea e por saber máis cousas sobre o seu libro. A través dunha coidada presentación, enterámonos de como xurdiu a idea do libro, de como se foi construindo, das súas influencias... Falamos de racismo, de conservación da natureza, de amor pola terra, de temas sobre os que a novela nos fixo reflexionar.

O alumnado estivo moi participativo: aproveitou a visita de Andrea para intercambiar opinións e sensacións provocadas pola lectura de Violeta Tamurana.

Fantástica a colaboración do Departamento de Tecnoloxía, que converteu o espazo da biblioteca nun fermosísimo bosque de tamuras. Grazas a Esther e aos alumnos de 4º. Tamén queremos dar grazas desde aquí á Biblioteca do Concello de Abegondo, que nos prestou os exemplares necesarios para que todos os alumnos tiveran o libro de Andrea Maceiras.

Nadal 2011 - Recomendacións

Consulta o catalógo para ver algúns dos libros que vos recomendamos para estas vacacións. Atoparás lecturas moi interesantes!

Haberá primavera, de César Morán

Na Biblioteca do noso centro xa podedes gozar do último traballo realizado polo músico e escritor César Morán, catedrático de Lingua e Literatura Galega no IES Agra do Orzán. Leva por título Haberá primavera, e consiste nun libro-disco no que o autor pon música a unha selección de poemas de Álvaro Cunqueiro, escritor do que se celebra este ano o centenario do seu nacemento. Esta non é a primeira incursión de César Morán no ámbito da poesía musicada (na súa ampla traxectoria conta con dúas gravacións poético-musicais: O pobo da noite e Ríos de son e vento, sobre textos de Manolo Rivas e diversos autores da literatura contemporánea, respectivamente), motivo polo cal os que sabiamos destes antecedentes agardabamos como auga de maio a publicación de Haberá primavera. Á vista do público asistente á presentación do libro-disco, non eramos os únicos: a sala quedou pequena para acoller a todos os que alí estabamos dispostos a gozar unha vez máis do talento deste trobador do século XXI. Acompañado de Alfonso Morán (contrabaixo) e Roberto Somoza (saxofón), César Morán agasallou coas súas melodías os poemas do insigne escritor mindoniense, abandonando as palabras, por espazo dunha hora, a habitual morada do papel impreso para fluir entre todos os presentes, convertíndonos así en efémeros habitantes do universo cunqueirano.

É obrigado comentar que na gravación do disco colaboraron, ademais dos xa citados anteriormente, músicos de sona recoñecida como Nani García, Luis Soto ou Uxía Senlle, o que nos dá unha idea da cada vez máis influinte presenza deste autor no panorama musical galego.

Por certo, como podedes ver na imaxe, César tivo un oco para asinar un exemplar e dedicárllelo aos lectores da Biblioteca do IES, polo que xa podemos dicir que en Viós... hai primavera!

Agustín Fernández Paz, premiado en Guadalajara (México)

Hoxe soubemos pola prensa que o escritor vilalbés Agustín Fernández Paz foi recoñecido co VII Premio Iberoamericano SM de Literatura Infantil e Xuvenil. Na acta do xurado destacouse o seu compromiso "cos valores universais e o papel determinante na construción dunha literatura infantil e xuvenil en lingua galega". Aproveitamos desde VIbliOS para mandarlle os parabéns, pois de todos é sabido que Fernández Paz é un dos escritores favoritos dos nosos lectores, así como un dos mais lidos. Cartas de inverno, Aire negro, O único que queda é o amor ou Noite de voraces sombras son algúns dos títulos que podes atopar na Biblioteca, libros que están á túa espera e que non che defraudarán. A que esperas?

FEBRE, de Héctor Carré

UN AVISO!! Xa temos na biblioteca a nova novela do noso conveciño Héctor Carré, Febre, unha novela que vén moi ben avalada polo Premio Fundación Nova Caixa Galicia- Claudio San Martín de Literatura Xuvenil e publicada por Xerais o pasado mes de outubro.

Ambientada nos inicios dos anos corenta, naquel tempo no que se desataba en Galicia a febre do wolframio - como se fose a febre do ouro- entrelaza a violencia e a represión propias da posguerra coa esperanza, o amor e a loita pola liberdade de Carmucha, unha moza de dezaseis anos, que se enfronta a todo isto coma a heroina dun "western moderno". Pasa pola biblio, anímate a lelo!

Twitter da Biblioteca: @viblios

Queres estar ao día e non perder ningunha das novidades máis destacadas da Biblioteca de Viós? Pois agora xa podes facelo: únicamente tes que seguirnos a través do Twitter, dispoñible desde xa. Vémonos en @viblios!

Segui @viblios

Imos de vacacións!!!! (Con LIBROS)

Por fin!!! Chegaron as vacacións! Que cansadiños estabamos todos despois dun curso tan intenso: clases, traballos, exames... menos mal que tiñamos as lecturas!

E coma sempre, dende VIbliOS, queremos desexarvos un feliz verán, descansando moito e pasándoo ben ( e os que teñan que facelo, tamén estudando, hai tempo para todo) pero, sobre todo, animámosvos a seguir LENDO.

Por iso vos deixamos estas recoemndacións nas que atoparedes títulos do máis diverso e para todas as idades.
FELIZ VERÁN!!!!

Recomendacións verán

IV XORNADAS DE CLUBS DE LECTURA

O venres 10 de xuño tiveron lugar en Santiago de compostela as IV Xornadas de Clubs de Lectura . Alí estivemos nós, representando aos Viós-bardos. Fomos invitadas a formar parte da mesa de experiencias "Un Club de lectura é algo máis". Resultounos un pouco difícil cinguirnos a ese "algo máis" porque o noso club é, nada máis e nada menos, iso: un club ao redor da lectura dos libros; as xuntanzas nas que compartimos as nosas impresións e escoitamos as dos demais, nas que ampliamos coñecementos ao buscarmos datos do autor, doutros libros do autor, das circunstancias históricas... nas que sacamos outros libros que estean relacionados cos que lemos, e que, ás veces, facemos máis doces ao acompañalas con croissants.

Pero non era diso do que había que falar, así que falamos do protagonistas que son os nosos Viós-bardos na vida do centro: elixindo e mercando os libros para a biblioteca, participando no Programa Arce ao aplicar o tema da igualdade aos libros de literatura xuvenil que se len no IES. Falamos tamén da importancia que ten "Hora de ler" para que poidamos avanzar tanto nas lecturas do Club e tamén de que sodes vós, coa vosa colaboración e coa vosa presenza os que facedes que os Viós-bardos existan.

Témosvos que dicir que abraiamos non só co número de integrantes (máis do 50% do centro) senón tamén co número de lecturas que realizamos en cada grupo ao longo do curso. Iso é mérito voso.

Peche do Club de lectura

O venres día 3 fixemos a despedida deste curso de lecturas e reunións cun, como é tradición, rico chocolate con churros.
Se facemos balance do que foi o Club ao longo do curso temos que mostrar unha gran satisfacción:

Somos moitos, non tantos coma cando comezamos (59) porque algúns, non demasiados, foron quedando polo camiño. Os fieis, que seguiron connosco ata o final, foron uns bos lectores e bos contertulios.
• Entre os Viós-bardos, como non podía ser doutro xeito, hai un pouco de todo: grandes lectores (fundamentalmente lectoras, todo hai que dicilo) e outros aos que a aventura dos libros non os chamaba tanto; aínda así, temos que felicitarvos porque dun xeito bastante regular fostes asistindo ás reunións cos vosos comentarios preparados.
• Felicitar, especialmente aos Viós- bardos de 1º porque ao longo do curso a vosa capacidade crítica foi mellorando moito. Algúns de vós apenas abriades a boca nas primeiras sesións e agora xa non tiñades ningún reparo en mostrar ante os demais as vosas opinións.

Grazas por todo, Viós-bardos, estar convosco nos recreos, escoitarvos e facervos partícipes das nosas impresións foi un auténtico pracer .

Xa é definitivo: a actividade TEMPO DE LER queda incorporada ao Proxecto Lector de Centro.
Despois de avaliar os resultados da mesma ao longo do 1º trimestre en cada unha das clases e de valorar as opinións recollidas nas enquisas de alumnado e profesorado, o Claustro de profesores do IES de Viós vota a incorporación de TEMPO DE LER no Proxecto Lector de Centro.
Dende a biblioteca comentamos os cambios que nós observamos como consecuencia desta actividade:

• O aumento do número de préstamos: no momento actual chegamos xa aos cincocentos préstamos, a mesma cifra que se acadou ao final do curso pasado, e pola cal nos mostrabamos tan satisfeitas, pois supoñía duplicar a cifra do curso anterior.


• O movemento dos fondos: había moitos fondos que ninguén pedía nunca en préstamo, agora o movemento de libros é constante, todos son aireados, ven a luz do día, saen tomar o sol e a proporcionar pracer aos seus lectores. E non falamos só de libros de literatura, porquer tamén os libros informativos comezan a ser movidos.


• E o máis importanto: FALADES DE LIBROS, si, é un feito, comentades os libros, recomendádesvolos uns aos outros, vides á biblioteca comentalos connosco, pedirnos aclaracións... Dá gusto.

Esperemos ir a máis, nunca decaer nesta dinámica que se está estendendo, a de LER. Pero, coma sempre, fan falta regras para que todo funcione e sigamos sentíndonos satisfeitos. A 1ª LER e deixar ler, non molestar coa nosa actitude e interomper aos demais. Cando isto suceda a actividade suspenderase nesa aula. Cando isto se repita deixarase de ler polo espazo de dúas semanas e, se unha vez retomada a actividade hai que volver interrompela, entón a suspensión será por un mes e pasará a definitiva se de novo volve haber problemas. Polo ben de todos, esperemos que isto non ocorra.