Vios-bardos de 4º: O pintor do sombreiro de malvas

Entrado decembro, xa van rematando as charlas do noso Club de Lectura. Onte foi a quenda do alumnado de 4º ESO e xuntámonos para falar da obra O pintor do sombreiro de malvas, de Marcos Calveiro.
A escolla da lectura non defraudou; máis ben sorprendeu. Comentamos que non era do prototipo de obras que acostuman chegar ás nosas mans a estas idades e, coma no libro, a figura dos dous protagonistas ocupou o máis do tempo da sesión. Do mozo, gustounos a súa altura de miras e a súa afouteza para saír desa vila case represiva. De Vincent, entristeceunos a súa personalidade depresiva.
Pero o mellor foi poñer en dúbida o final, polo que vimos nesta noticia de prensa. Suicidouse Vincent ou matouno o mozo!?
E encantounos ir vendo -e descubrindo!- as pinturas de Van Gogh, esas que tecemos no noso imaxinario mentres iamos lendo.
Con todo, moitos quedamos con ganas de saber o devir de personaxes secundarios; outros, agradeceron que Calveiro non o resolvese todo e deixase voar a nosa lectura.
En fin, lectura moi moi recomendable e con ganas de aventurarnos na seguinte.